廢董噚日好醒咁拍板話九月十二日舉行立法會選舉，大家都收到，佢冇話改變遊戲規則，即係重可以投民主派同余若薇啦。
至於由煲呔主持嘅政制發展專責小組，已開始咗就「三項原則五項程序」徵求意見，網頁每日有成幾千個hits，反應唔錯。
但八方有幾樣嘢唔明。點解徵求意見會冇期限嘅呢？唔通一直諮詢到○七？再問啲阿媽係女人嘅問題，香港政制發展如何能夠符合基本法第一、十二、四十三同四十五條嘅原則？基本法第一條話香港特別行政區係中華人民共和國不可分離嘅部份，係人都知香港同中大陸冇得分離，唔係邊有水飲，邊有啖好食啫？重有，林D9研究咗好耐先宣布「二○○七年以後」包括埋○七年，煲呔亦係海外講過，𠵱家又攞出嚟問，即係玩嘢，自打嘴巴啫。
八方咁多嘢講，官場中人馬上解答，冇期限係因為要畀時間大家熱身，至於八方認為阿媽係女人，但好似鄔醫生未必同意，都要畀人哋噏吓㗎。
傳真︰2623-9278
電郵︰