阿仙奴門將列文同拜仁慕尼黑門將簡尼加埋雖然近七十歲，但認真唔化，居然為咗德國隊嘅正選位置而互插。
今屆列文喺阿仙奴打得好好，重幫球隊喺超聯做出連續廿六場不敗，於是佢就叫今屆踢得麻麻嘅簡尼讓出喺德國隊嘅正選位；咁都未算，啲記者問佢點解同簡尼冇偈傾，佢竟然咁話：「鬼叫我冇個廿四歲嘅女朋友咩！」
簡尼亦不甘示弱，話起碼踢到○六世界盃，重叫列文等得就等（列文同佢都係三十四歲）。而佢兩個玩舌戰，搞到德國教練禾拉要去做中間人調停；而列文亦自知自己理虧，公開同簡尼道歉，事件先告一段落。
我求大俠就認為，講就無謂，行動最實際，佢兩個喺今日凌晨進行嘅歐冠盃都有份踢，究竟邊個先係冧巴溫，禾拉同球迷都應該一清二楚。
賀姆斯六年前效力查爾頓時，俾當時效力狼隊嘅梅斯卡踢斷左腳，要收山，經多年訴訟後法庭判狼隊要賠二十五萬鎊畀佢。我求大俠同意法庭判決，但就戥狼隊唔抵，事關梅斯卡𠵱家經已唔係狼隊嘅球員，咁都要賠真係好慘；重有，狼隊咁窮，咁咪等於喺乞兒兜度攞飯食。
荷杜同史特根呢兩位修咸頓前任領隊，最近遭遇真係兩個極端；前者想返去教波，不過修咸頓球迷重對佢懷恨在心，成日都喺比賽見到球迷舉起晒「不要荷杜」嘅橫額；至於史特根，坐喺度唔使做都會傳出蘇格蘭國家隊及熱刺都有興趣搵佢執教，呢啲咪同人唔同命囉。
巴塞隆拿會長拉樸達又有偉論，佢話如果佢係亨利，一定會加盟巴塞隆拿，因為巴塞就係世上最好球會喎。結果阿仙奴領隊雲格回應：「我都識話想買白金漢宮啦！」無錯嘞，講同做係兩回事，好心你拉樸達咪成日吹水話買呢個買嗰個，一係就畀啲實際行動，都係雲格窒得應！
喺上個禮拜六活塞主場對木狼時，原本係華萊士加盟活塞後嘅「地標」，點知活塞啲高層懵盛盛，唔知道部份交易文件根本未搞掂，累到華萊士打咗十二分鐘就被迫離場，活塞最後重輸埋場波㖭。咁重未算，聯盟噚日又罰咗活塞成二十萬美金，今次真係賠了夫人又折兵囉！