係咪呀，話咗會有好多人睇《拳霸》、講《拳霸》㗎啦！
男女觀眾散場時眾說紛紜，但總括一句其實都係服咗男主角東尼．渣，拍功夫片最緊要拍到觀眾服，《拳霸》就拍出呢個服字。觀眾中有年輕人將東尼．渣與李小龍相提並論，甚至話：「勁過李小龍！」作為李小龍的DieHardFans，我死人都唔認為係。唔好講功夫住，講第啲。
李小龍靚仔，李小龍嗰對眼同埋魏平澳話齋：「那一身的肌肉……」，充滿了男性性感魅力，無數鬼妹朋友以李小龍為性幻想對象。
李小龍時髦，李小龍的招牌烏蠅深淺茶色鏡、大領口綁繩緊身衫、貼蘿柚喇叭褲然後起腳、白色利工民底衫突然出拳，通通都會一百年、一千年、一萬年咁興落去。
李小龍離譜，試問有邊個夠膽喺打完人之後，呀呀呀咁嗌足一分鐘，有邊個夠膽一路起腳一路嗌曱甴曱甴！簡直係驚天地、泣鬼神，前無古人，後無來者嘅個人信心爆棚驚世演繹。李小龍不是一個武術家，他是一個哲學家，甚至是一個思想家。截拳道不是武術，是一種哲學，甚至是一種思想方向。
只有一個李小龍，就算有人再點好打，點樣批踭飛膝倒頭一炷香，世上也只有一個李小龍。以無法為有法，以無限為有限，獨一無二李小龍。