愛國大罵戰，國家今次雷霆萬鈞，實行得勢不饒人，上次跟住口水蕭落嚟嘅新進「法律專家」夏勇，亦唔畀面，發表強硬文章，並警告若然香港人重唔識死，中方將會隨時宣布香港進入「緊急狀態」！
一進入「緊急狀態」，即是軍管戒嚴，解放軍出營，駐守中環尖沙嘴，亦可以將「內地」法律搬來特區，隨時可以拉人，到時就唔止拉李柱銘長毛咁少人，出得咁大成本，就梗要收番好多利潤。
愛國大罵戰經已進入反智狀態，鄔曾經已成為「影子特首」同埋「影子政務司司長」，一個唱《沒有共產黨就沒有新中國》，一個發明「餵狗論」，經已取代咗由唐唐、煲呔曾（簡稱唐曾）打理嘅特區政府日常運作，成為「鄔曾臨時政府」！
鄔曾大過唐曾，所以夏勇亦以國家領導人身份，跟多一招大石砸死蟹，將把槍放咗喺枱。不過唔使擔心，香港六百萬市民，經已看在眼裏，九月立法會選舉，一定會聽從國家吩咐，帶眼識人咁選擇立法會領導人。
唔使夏勇宣布，人人都知道香港已經進入失常狀態。親中議員蔡素玉，竟然天大面子，得到福建統戰部大員親來撐場。重有一個「春節慰問團」南來「慰問」。咁香港即是已經係「災區」，因為以往只有李鄭屋村木屋大火之類，中央人民政府先至會派「慰問團」。愛國人士提點：胡溫真係當咗香港係一個政治禽流感地區，受災人士包括成個親中陣營，唔實行中央屠宰，睇怕都唔會洗到太平地。
禽流感肆虐，好多人都失控。馬力大罵吳靄儀唔係「中國人」、冇資格議政，嗰頭，美國人陳啟宗就反而雞啄唔斷咁教訓人應該點樣愛中國。若然阿Ronnie可以帶頭撕毀佢本美國護照，以抗議美國軍機謀殺我空軍英雄王偉，並好似盧維思咁，加入中國籍，香港人嘅愛國熱情肯定會高漲好多。
咁多人黐線，幾時癲到九月？香港人真係有眼福。不過，出動到統戰部嚟拉票，唔知有冇用？八方有個福建老友，佢突然發現蔡素玉個樣，原來好似台灣副總統呂秀蓮，為咗更好地「愛國」，佢話佢決定九月一定唔投素玉姐票喎！
傳真︰2623-9278
電郵︰