越秀投資喺廣州，屬於「阿哥」級發展商，舊年推售項目，樓面二百五十幾萬呎，發展緊嘅主要項目有成一千一百二十幾萬呎。
相對起嚟，香港呢個只得九萬六千呎、薄扶林單幢樓富臨軒，確係小巫見大巫。唔怪得越秀投資董事總經理歐兆禾話：「喺內地開三日會，都未輪到呢個（富臨軒）項目。」
雖然係咁，但越秀對呢個盤都好重視，睇番噚日富臨軒記者會，就已經有四位高層出席。
歐兆禾話，公司好睇重香港市場，希望呢個盤可以係越秀重返香港地產界，首個「省招牌」之作，所以會安排多啲人手嚟香港，加強香港嘅工作。
記者會之後，樓盤代理利嘉閣，攞個蛋糕出嚟同大家分享，蛋糕面重有「南區鐵路地標物業」字句，重顯示埋地鐵華富站㖭，順手幫個盤宣傳一吓。
失業人士搵工出路係乜？睇嚟物業管理公司保安員係其中之一。
好似恒基旗下恒益物業，千三名保安員中，一千個係讀完僱員再培訓局物業管理訓練課程嘅學員。恒益重啱啱攞到該局僱主金星獎白金大獎。恒益執行董事孫國林話，佢哋98年起聘請該局學員，並逐年增加。
佢哋建議，畀會所推拿員與會所美容師學員，喺屋苑會所提供服務。咁就一舉兩得啦！
攞到僱主金星獎白金大獎有四家，物業管理公司佔其三，另兩家係富城集團同康業物業。喺得獎名單中，物業管理公司佔九家，即三成二。
內地客嚟香港買樓，近期又多番，佢哋為咗買到心頭好，都一樣不惜追價。
香港置業分行經理黃永忠話，一名福建籍自由行客，睇中大角嘴帝柏海灣（圖）一零三五方呎三房單位，間隔好又向東南，所以五度追價，加咗四十八萬。最終成功打動業主，買入呢個單位。聽講，原業主開價五百萬，原本唔係好想賣，但見個客係咁追價，諗咗一晚至肯成交。
黃永忠講，個客係第一次入市，會以一次過付款找數。單位連租約，月租萬六蚊，明年約滿。
中原地產似乎未受發展商減佣影響，董事總經理黃偉雄話，後勤員工首季花紅決定再加碼，由半個月增至四分三個月。
睇番中記佣金收入，本月至今，住宅部達億一，工商舖部一千六百七十五萬，夾埋重高過公司之前定落每月一億二千五百萬嘅指標。
另外，中原中國部佣金都有二千三百幾萬，一啲都唔遜色。
董事總經理黎明楷話，旗下浙江中原，同浙江省中國銀行達成協議，可以喺佢哋分行，開設客戶服務中心，成為第一家可以咁做嘅港資代理行。
新地長沙灣星悅居，計劃撥出一個舖位做茶餐廳。
原來呢啲位好搶手，蘭西聽聞，將軍澳區有啲經營開茶餐廳嘅店主，正想物色合適地點開分店。睇嚟只要發展商開價唔係好貴，應該好易租得出。
呢個星悅居茶餐廳舖位，估計係針對附近工廠區客為主，走價錢經濟實惠路線。
蘭西
電郵地址：
