賣魚賣到做街市老闆的蘇淥銘，自製光碟四出推銷改裝街市雞檔搞好衞生，讓街市可以繼續賣活雞，抗衡中央屠宰浩蕩大勢。他近年進軍飲食業，旗下食店有「點心皇」。 撰文：李慧玲、攝影：黎樹雄
我做街市廿幾年。呢個行業，我叫老本行，第日有乜其他成就，都唔會唔記得老本行，我連個老婆都係街市畀我。我哋係街市行家，識於微時。
………………………………
我阿爸賣魚，我因為百厭唔想讀書，中三放低書包，自自然然做咗呢行。初初覺得啲田鷄好肉酸、魚鱗滑潺潺，叫人買嘢又唔好意思講，但做咗幾年，就有機會同人夾份做街市承包商。
不過，做街市年終無休，都試過覺得攰，九一年有六四因素學人移民，去到加拿大先知道，原來冇嘢做都好辛苦。四年夠鐘，即刻回流香港。現在，我朝朝早巡吓街市，同啲檔主講兩句笑，好快又一日。
………………………………
近幾年，超級市場愈來愈街市化，我哋生意已經唔見咗三成。𠵱家唯一超市冇得賣嘅，就係活雞，佢哋驚搞唔掂啲衞生。
舊年沙士期間，我知道中央屠宰隨時打到嚟，街市無活雞賣，即係連條最後防線都守唔住。七、八月時候，我急急腳同個行家飛去新加坡，專誠去牛車水街市睇睇。一睇，心都實埋。新加坡無活雞賣，剩係賣冰鮮雞，我哋見到街市賣雞嘅，個個好似看更阿伯，冇厘精神，因為根本冇生意。
………………………………
冰鮮雞又點可以同活雞比？我同行家諗計，度咗個人禽分隔方案，就係將啲活雞用密封車運到街市，街市檔口有塊板隔開啲雞同啲客，街市嘅空調當然都要改裝，美國、墨西哥都有咁做，保證衞生安全。
………………………………
我哋計過，每個檔口改裝費大約兩、三萬，全港四、五百個雞檔，一千萬搞掂。我哋做咗隻光碟，畀咗食環署，又畀議員，但幾個月班人都冇乜反應。