阿Ann（左）回歸前自內地來港，四年前開始在有富豪飯堂之稱的海都酒樓做知客。香港人在內地由「金菠蘿」變成「港燦」，香港Sales對大陸客由「睇唔起」到「好熱情」，她都看在眼裏。 撰文：李慧玲 攝影：凌樹輝
我喺內地出世，九六年同親戚一齊來香港。時代唔同，阿爸阿媽最初好想我來香港，但我今日返鄉下周街聽到有人叫「港燦」，都咪話唔心嗡。香港點解咁慘？
我喺大陸嘅時候，睇電視見到啲香港人住大屋，唔係打波就係食飯；到咗香港之後，我最初住屯門公屋，晨早六點鐘望出街，巴士站已經排晒長龍，夜晚七、八點先見啲人陸續返屋企，先知道原來香港人生活係咁嘅！
………………………………
幾年前，由朋友介紹我入行做酒樓，日日企十幾個鐘，真係好辛苦，我唔想大陸嘅阿爸阿媽擔心，惟有頂住。但香港令我最唔舒服嘅係先敬羅衣，見你周身名牌，就當你闊太；我有時落場着住件酒樓衫入間舖頭，啲Sales眼望望，擺明睇你唔起啦！就算平時行公司，啲人同樣有說話畀你聽，好似隔好遠冷冷淡淡話：「係咪買？買就攞size畀你！」我都係做服務行業，我啲態度一定唔會咁。
其實，好多客着得好普通，但係好有錢，做人唔可以睇外表。
不過，香港𠵱家已經唔同晒。我個look一望就知內地嚟嘅，去到SOGO，啲人會同我講國語，啲Sales爭住用國語嚟sale你，好熱情，好想做你生意。
自由行喎，大陸人個個都好似大豪客。
………………………………
我響大陸嘅阿爸阿媽細佬，𠵱家都已經唔想再來香港。我細佬做裝修，同女朋友兩個人住間屋千幾呎，前後露台；喺香港，真係無得比，就算太古城都密質質。
不過，你叫我返鄉下住又唔得，我瞓晏啲十一點起身，人哋已經話收工，無乜嘢做又一日，好浪費。而且，喺香港，辛苦係辛苦，但感覺好自由，示威遊行都無所謂。
從頭再揀，知道咁辛苦，我一定唔會來香港；但現在，算係融入咗香港生活，返唔到轉頭。