劉德華、張學友、陳冠希（Edison）、吳倩蓮和曾志偉等昨日拍攝新片海報。近日有報道指華仔因官司纏身，所以接拍該片「撲水」，華仔和志偉昨日同時否認，志偉更踢爆華仔片酬高達一千萬。
劉德華、張學友、陳冠希、余文樂、吳倩蓮、曾志偉和林家棟等，昨日凌晨在灣仔拍攝新片《江湖》的海報。眾人在餐廳的長枱拍攝，氣氛嚴肅。
有報道指華仔因為要「撲水」打官司，故此答應志偉演出該片，志偉說：「呢個傳聞好無稽，佢救我就真，係我叫華仔幫手拍，佢嘅片酬係最高嘅一部，要成一千萬。華仔重話我係佢嘅幸運星，佢之前攞第一部一百萬片酬都係我搵佢，𠵱家又搵佢拍套一千萬嘅戲，下一次要畀一億片酬佢。」華仔對於「撲水」傳聞亦立刻否認，他說：「我都有份投資套戲。我公司都會用法律方式了解一下，都唔知點解會咁寫。」
華仔和吳倩蓮今次再結片緣，見他對吳倩蓮照顧有加，吳倩蓮說：「我呢次片酬係收封利是，我可能同華仔拍戲太多，情侶形象好深入，都唔使刻意交代。」
對於《江》片近日在西環鬼屋附近拍攝時，有工作人員表示聽到女子喊救命之聲，張學友表示不太擔心，他說：「我都係聽人講，但冇見到。」
學友憑電影《金雞2》角逐金像獎「最佳男主角」，他說：「如果要我揀，我睇好華仔同劉青雲，自己排第三。」
此外，有消息指志偉日前跟水警友人踢足球時，雙方起衝突，志偉更以粗口罵人，他說：「我俾人踢，我唔想多講，立咗品。」
採訪：陳梅香 攝影：陳偉權
