呢排港股冇乜力，噚日更跌成百點。有人話因為美元強，有人話因為前晚播秋官套電視電影《紅杏劫》，最弊係鄭少秋又有新劇推出，呢套名為《血薦軒轅》嘅古裝劇，三月八日出街。舊年十月六日秋官套《非常外父》首播，當日港股升咗百二點，大家都諗住秋官終於打破「丁蟹效應」宿命，但套劇播到第十四集，港股急跌五百點，創兩年來單日跌幅紀錄。
丁蟹效應源自九一年秋官為無綫拍長劇《大時代》，扮演丁蟹一角，並以沽期指將股市推低而致富，劇集播出時，真係出現股災。之後每次秋官有新劇出街或者重播舊劇，或多或少都會跌。
最厲害一次係九七金融風暴，當時亞視播緊秋官套古裝劇《江湖奇俠傳》，其間港股跌咗差不多三成。今次套《血薦軒轅》又係古裝劇，真係得人驚。不過呢次係秋官同十年來冇合作嘅汪阿姐一齊拍，唔知汪阿姐頂唔頂得住丁蟹效應呢？
傳真︰2623-9278
電郵︰