大市噚日走軟，恒指曾一度下跌177點，尾市跌幅收窄，但仍跌103點，3月期指則大低水61點，芬佬話大市走勢短暫受美元強勢影響，但回一回又會再上過，佢哋看好後市立場並冇改變。
國企上升股較多，指數收5037，有30點進帳。5大之中，有3大上升，中石油（857）同中石化（386）都升5仙，華能國際（902）就有0.25元進帳。鋼鐵股最突出，鞍鋼（347）同重鋼（1053）升幅都逾4%，而馬鋼（323）較落後，只升1.7%。中國東方（581）認購大熱，料只配得「雞碎咁多」，投資者退而思其次，轉頭就掃入鋼鐵股，希望中國東方掛牌之日，會帶起鋼鐵股。鋼鐵股短炒係有計，早前已提過3隻鋼鐵股嘅目標價，中長線重吸引。
文化傳信（343）腳步唔停，唞一唞氣，又再升過，收0.54元，又升11%，偏低股一有資金落叠，升勢可以一發唔收。噚日逆流而上而明顯又有資金入市的股份，就係彩星集團（635），呢隻股已跌夠，應到時候玩番上。
彩星收1.24元，升5仙，成交2082萬股，比上周五的489萬股，大增3.25倍，股價亦一舉而升破10日線（1.2元）同20日線（1.21元），同埋去年11月開始伸延的長期下降軌，長達3個月的中期調整，相信已告一段落，雖然前路阻力重重，包括50日線（1.287元）同圓頂底部的1.4元，但本月27日（禮拜五）派成績表，若然對辦，則升破兩重阻力，重上1.6元，應該冇問題，中線更有機會向2字頭推進。
03年度（12月年結），彩星盈利應有1億元，每股盈利約7仙（已經配售新股調整），大增64倍。04及05年，盈利仍可保持高增長，每股盈利16仙及25仙，分別增加116%及60%，現價PE分別只係7.7倍及5倍，多家大行都推介買入，目標價由2.25元至2.5元不等。
去年彩星轉捩，今年重更具爆炸性，原因係忍老龜新戲下半年推出，將會掀起新一浪的忍者龜熱潮，估計今年的銷售額，會以倍數增長。集團今年首季定單同比已增加60%，相信全年盈利可達到預期水平。
郭兆誠