大市走勢唔多好,雖有滙豐(005)做「定海神針」,但地產同電訊股唔生性,恒指挫103點,收報13765。國企股較好,國企指數升30點,昨日介紹嘅中企同中石油Call輪都有進帳。
港股成交連日縮減,昨日多番啲,亦不過158億元,似乎係調整市居多,後市未必真係咁淡,若見恒指跌多一兩百點,不妨揀啲恒指Call輪博反彈。
恒指Call輪有兩件數據唔錯,9282現價30.5仙,溢價1.3%,槓桿率14.5倍,玩到5月28日;9209同日屆滿,現價43仙,溢價1.1%,槓桿率12.3倍。呢兩件其實條件差不多,屬於抵玩嗰類。
鍾意炒出炒入又想刺激啲,9530不妨考慮,現價14.7仙,7月尾期滿,溢價6.2%,槓桿率22.3倍夠爆炸。呢件一向旺場,昨日就超過2億份易手,相當好炒。
大隻銀行股企得幾穩,滙豐冇升跌,恒生(011)升1個位,中銀(2388)則跌1格。滙恒下周一派成績表前,唔易大散,中銀調整亦都差唔多,相關Call輪要望多兩眼。滙豐輪正路揀9274,貪心嘅可博隻9288;恒生輪9162較好;中銀輪短炒揀9238。
章 盛