愛國標準，爭論不休，有人話政治爭拗開始影響股市，而港股近日轉趨淡靜，恒指收報13765，跌103點，成交金額僅158.31億元。
表面上，現時市況與93年政治市有啲相似，當時投資者擔心出現政治「直通車」，以致欠缺入市意欲。不過，今次情況其實唔同，因為市場對中港政治關係可謂漠不關心，而且預咗中央一定會干預特首人選。阿虎至今都睇唔到有人擁有特首才能，要非選佢不可。中央其實只要搵個唔好成日政策左搖右擺，經常令港人條氣唔順嘅人代替老董，已經好足夠。
雖則魚缸內冇嚟鑊氣，不過散戶對新股熱情未冷，中國東方（581）噚日截止認購，唔少散戶都入票認購，博抽到一兩手，可以賺餐茶。中國東方主要持有津西鋼鐵，屬鋼鐵股，招股PE最高為8.2倍。馬鋼（323）現價03年度PE預測9.4倍；鞍鋼（347）預測12.35倍，中國東方相比之下，仍有吸引力。
鷹美（2368）停牌，有待公布引入新控股股東消息。阿虎希望鷹美今次賣盤，唔好學玉皇朝（970）咁臨尾香。玉皇朝向大股東洽購漫畫業務，但最終達唔成協議，復牌後股價大跌12.6%。鷹美2月份炒賣盤消息，由1元炒高至逾2元水平，如果最後賣唔成就大件事。市場仍傳買家係裕元（551）及新灃（1223）。
張如深入股上海策略（164）後，隻股炒味即時轉濃，噚日股價升13.7%，收0.058元。
張如深先前曾入股慶豐集團（661）但好快就轉手，其後又入股邁特科技（1031）。張氏好似對仙士殼股特別有興趣，每次入股後均有一輪炒風，但就唔長久。
阿 虎