唱片滯銷指Fans捧偶像自作自受
陳慧嫻再退出：唱嚟嘥氣

陳慧嫻剛復出樂壇不久，可是唱片的銷售欠佳，她前晚表示會再次退出樂壇，在完成巡迴演唱會後，便重返校園讀書。陳慧嫻更批評觀眾並非真心聽歌，只是吹捧偶像表演。

陳慧嫻前晚在紅館為周啟生演唱會任表演嘉賓，她表示在四、五月做完巡迴演唱會後，便會再次退出樂壇。慧嫻有這個決定，主要因為她認為時下樂迷只為看偶像的表演，而非真心想聽好歌。

「呢個樂壇點搞」
問慧嫻可會再唱歌，她說：「我舊年放咁多心機，環球唱片又放咗好多錢宣傳，結果只係賣得八千張唱片，呢個樂壇到底點搞？𠵱家啲人只係睇偶像，睇娛樂人表演，唔需要用心聽歌，唱嚟都嘥氣。我對觀眾失望！」慧嫻又晦氣地表示並非對樂迷心淡，她說：「冇心淡，呢啲係樂迷所得嚟嘅結果，自作自受。」
有消息指環球早前裁員是裁走歌手，慧嫻更榜上有名，她否認說：「唔係我，我嘅心情好似今晚唱首歌嘅《無奈》咁，我冇諗過拍戲，𠵱家間間唱片公司都冇得做，八千張同八萬張比較，唱片公司賺唔到錢。」

「留喺香港讀碩士」
問慧嫻是否返回美國繼續學業，她說：「好大機會返去讀書，我會去讀心理碩士，但會選擇喺香港讀，因為男朋友喺香港，佢好支持我個決定，佢重話我適合做輔導工作㖭。」
此外，慧嫻日前做關心妍演唱會嘉賓，她的身形臃腫了不少，惹來大肚疑雲，慧嫻說：「主要係因為我着錯衫，而且我肥咗十磅，𠵱家開始減肥。」
採訪：李珮洳　攝影：仇志德