向以製造高性能豪華轎跑車而聞名嘅賓利汽車，繼早前推出全新ContinentalGT跑車備受車迷追捧後，日前又宣布佢哋正為旗下嘅Arnage車系，預備喺不久將來推出經改良後的新版本。
可稱得上係新一代版本嘅賓利Arnage，單係車首部份已教人耳目一新；皆因新車車首造型，略帶有同廠ContinentalGT跑車嘅影子，尤其係一對以雙圓燈示人嘅Xenon頭燈、大幅面鬼面罩，同埋引擎蓋嘅線條，就最能將呢個特點展露出來，連帶頭泵把亦有改動，造型可謂來一個大革新！
至於車廂方面，廠方亦有為新版Arngae車系作出改良，當中有操作更容易嘅中控台編排、承托力更佳嘅高級真皮座椅等等，比舊型號坐得更舒服。
引擎配搭則會以一台6.75公升V8Twinturbo偈作核心，馬力及扭力輸出分別係400匹及85.2kgm（ArnageR及RL），同埋450匹及89.3kgm（ArnageT），用以驅動此車可謂綽綽有餘，車迷要密切留意新車嘅推出日期喇！