由劉嘉玲、張栢芝、朱茵同張文慈等主演嘅新片《性感都市》，喺後日上映，呢部戲由咁多個性感女星擔演，鬥靚鬥演技就自然唔少得啦，要成功突圍真係有啲難度。
栢芝雖然已經去咗內地拍新戲《小白龍》，但佢都好緊張部戲嘅試映反應，因為今次佢喺部戲做一位千金小姐，但其中一場戲，佢要犧牲色相扮醜女，除咗要髹黑啲牙扮煙屎牙之外，又要整到自己好污糟。
栢芝話以前都未做過呢類角色，所以佢覺得幾新鮮，不過計我馮仁昭話，夠晒突出就真。
喺部戲度栢芝係做鍾鎮濤個女，劇情講佢父母一早分開咗，佢跟個有錢老竇鍾鎮濤住，但個老竇成日忙搵錢，完全當佢冇到，所以佢為咗引起老竇注意，先會成日整到自己好污糟。好少女星肯整棚煙屎牙俾人睇，栢芝都算夠專業喇！
台灣女子組合S.H.E近日推出文具，一套包括筆袋、筆記簿、鉛筆同間尺，限量五千套，每套賣七十幾蚊港紙，希望吸納埋學生一族。不過有人就批評S.H.E代理好多產品，好似想搶歌迷嘅錢咁，馮仁昭認為有時歌迷係牛唔飲水唔㩒得牛頭低啫。
名模陳嘉容﹙Eunis﹚早前去泰國曼谷幫一個元首級聚會行騷，示範泰國設計師設計嘅時裝同珠寶。陳嘉容好興奮咁透露有幸同偶像前輩、八十年代名模Nadja同場，佢話：「佢出名雙腳靚，傾談間先知佢已經生咗兩個囡囡，依然keep得咁好！」
無綫日前裁員引起員工不滿，無綫助理總經理陳志雲噚日同職員協會代表開會，商談解決彼此間嘅問題，職員協會副主席劉順安話希望公司加強對協會嘅認受性，同埋提高員工嘅知情權。陳志雲表示會議氣氛和諧，相信協會明白公司裁員係營運原因。
粵劇名伶吳君麗噚日到沙田文化博物館捐贈三千幾件粵劇文物，好多麗姐嘅戲迷捧場，重不停讚佢靚女，𠱁得佢不知幾歡喜。麗姐話近年都係拉吓二胡過吓戲癮。問佢有冇食燕窩養顏？佢就笑住話：「燕窩唔係我食，我通常都係清茶淡飯啫！」
黎姿同楊怡噚日喺西貢為無綫新劇《水滸無間道》拍攝一場揸電車單戲，雖然係楊怡扮揸車，但坐喺後面嘅黎姿重緊張過對方。黎姿專登戴咗隻假鑽表出嚟，佢話：「我啲朋友都問我使唔使三十幾萬，梗係唔使啦，個老細重畀咗半價畀我，只係五十五蚊咋。」真係估唔到黎姿戴假嘢都可以咁得戚，真係服咗佢啦！
