雖然早排唔少股份，在配完股之後即刻跌穿批股價，搞到好多人唔多開心。但唔係隻隻股票都冇售後服務，好似經紀黃推介嘅超大現代（682），就穩步上揚，噚日升6.4%，收2.90元，成交金額6035萬元，場面夠晒熱鬧，對捧場客算好有交代。
亞洲鋁業（930）批股後跌穿批股價。但經紀黃話，唔好以為人哋收完錢就唔理，聽講芬佬仍然坐落唔少貨，所以公司好努力招呼一眾分析員同其他芬佬，據講反應唔錯，頗為受落。
亞鋁1月份在見過1.77元高位後，旋即以先舊後新方式，每股1.56元，配售3.32億股，集資淨額5.065億元。公布一出，股價即刻大散，噚日又跌2%，收1.44元，繼續低於批股價。
雖然經紀黃話芬佬仍然睇好亞鋁，不宜睇得太淡。不過短線嚟講，亞鋁有隻公司輪（314）將在4月份到期，因為行使價只係0.77元，估計有人會行使，短線或會對股價有影響。
慕容小初