董方卓日前終於首次替安特衞普喺比甲亮相，重擺烏龍。但唔係好似阿仙奴雷耶斯咁，只係着錯波衫！
事緣董方卓下半場入替上陣，當佢入場後先至發現自己「擺老烏」，原來着咗件二十七號波衫，但其實被領隊安排着十七號，搞到好尷尬咁要走到場邊換番件衫。安特衞普最終一球輸畀主隊比斯查，繼續排喺包尾位置。董方卓賽後話唔係好滿意自己表現，但係一批安特衞普球迷對小董印象唔錯，重用拼音叫佢個中文名幫佢打氣。不過，我求大俠就提醒佢，如果第日有機會返曼聯，真係唔好再着錯衫咁肉酸！
阿仙奴目前喺英超聯領先，而佢哋都好識為未來打算，最近就簽咗保頓嘅尼日利亞中場奧高查嘅七歲外甥伊奧比。喺五月就會入讀阿仙奴少年足球學校嘅伊奧比，雖然年紀輕輕，但入球能力就好勁，去季就喺列普威爾少年隊入咗三十三球，佢重話會以舅父奧高查做奮鬥對象㖭！
熱刺近期啲波黐晒線，計埋周日四比四迫和客軍李斯特城，四場波入咗十五球！臨時領隊柏列特話話之你係邊隊，總之繼續大踢進攻足球。佢梗係可以豪氣啦，因為下屆領隊好大機會唔係佢，踢啲有前冇後嘅波又可以娛人娛己，話唔定可以畀到其他班主好感㖭。
佩魯賈開齋啦！呢支褪色嘅神奇兵團，終於喺前日憑季中加盟嘅老將胡拿補時入波，作客砌低里賈納。呢場勝仗固然嚟得遲，神奇就神奇在佩魯賈今季成日衰收尾失分，今次算食尾胡贏番鋪。不過我求大俠唔會因為呢場波就睇好佢哋，至怕佢哋係迴光返照，睇多幾場先講啦。
華倫西亞開拓東亞市場計劃終於展開，球會官方網站同皇馬一樣加設日文版本，而下一步會準備在今年暑假，到東京踢友誼賽，亦唔排除引入一名日本球員，實行同皇馬由場內鬥到場外。如果華倫西亞決定東亞之行，連同皇馬同巴塞，西甲三強全部東來「掘金」，今個暑假真係熱鬧。