新地SignatureHomes系列，加推十個中半山帝景園單位招租，每呎四十蚊，全包連家具，入場費七萬五。
物業會所設施都幾多㗎，例如有高爾夫球練習室、籃球場、泳池、電子遊戲機室同餐廳等。唔知係咪因為咁，有啲租客零舍鍾意住呢度。
SignatureHomes董事總經理趙靖詩話，有個帝景園租客，租開最大碼四房單位，住咗五年幾，嫌地方唔夠大，但就唔捨得搬走，明知單位唔可以打通，寧願分開門口出入，都要租埋隔籬，點都唔肯換樓。呢個租客係美國人，喺香港做投資銀行業務。
不過，講到帝景園長情租客，佢都未算第一，因為最長一個，一住八年。
其實，SignatureHomes除咗幫新地出租豪宅外，重兼任旅遊文化大使，請專人帶班外籍租客去茶餐廳、買街邊貨，甚至上深圳掃平貨，得閒又教佢哋打吓麻雀，實行學做道地香港人。
搭飛機真方便，一名台灣客，上晝飛嚟香港買樓，下晝搭飛機返去。
香港置業分行經理黃永忠話，呢個台灣客啱啱用四百二十八萬，買入大角嘴柏景灣低層三房單位，九八五呎，連租約，諗住年中約滿後收番嚟自住。
因為呢個單位冇得睇，佢只能睇屋苑其他單位。個客即場畀咗幾萬蚊做臨時定，返到台灣就電滙十三萬畀個經紀做定金。
黃永忠透露，個台灣客之前買咗長沙灣嘅宇晴軒同泓景臺各一伙，連埋呢個單位，總值八百幾萬，諗住申請投資移民。聽講，遲啲重會喺香港租舖開食肆㖭。宇晴軒同泓景臺單位就做員工宿舍。
「有人漏夜趕科場」，正當兩大地產代理集團，因發展商減佣而削減一手員工，世紀21卻擴充一手業務。禮拜五舉辦招聘會，希望倍增一手人數，請三百人。
世紀21地產集團（香港）總經理鄧慶年（圖六）認為，雖然發展商減佣，令一手利潤大不如前，但一手供應充裕，樓價又大幅回升，仍有可為。
同行縮人，佢哋有機會搶奪市場佔有率，由唔夠一成，提高到兩成。
住客對物業設計要求愈嚟愈高，萬泰集團知道呢一點，專程搵咗澳洲設計公司WoodsBagot，幫手設計郝德傑山。
負責呢個項目嘅設計師崔接成，作品攞過唔少獎。其中一個獎係金融機構JPMorganChase美國總部。聽講，得獎原因之一，係融滙中西文化，重喺總部整咗個風水金魚缸㖭。
崔接成話，郝德傑山今次會引入木材、石材同埋玻璃等天然元素，營造出自然、時尚兼高雅嘅感覺。
蘭西
電郵地址：
