八大校長中，作風向來較大膽嘅浸會大學校長吳清輝最近打破禁忌，喺新一期校刊《新領域》中，公布浸大收生成績。原來浸大收生成績一啲都唔差，本學年嘅新生整體高考成績，喺八大中排第四；語文方面，英文同中文分別喺八大中排第四同第二位，佢好開心咁話呢個係好消息。
八方噚日問過其他院校，佢哋都話新生整體成績係秘密，大家話咗唔公布，唔知吳校長咁做。唔知吳校長會唔會畀八大校長杯葛呢？不過𠵱家大家都講要增加透明度，吳校長咁做無可厚非。
佢又自爆去年底同副校長范耀鈞去咗歐洲，喺咁嘅削資時勢，當然唔係嘥錢去遊玩，而係想同歐洲院校開拓合作機會。佢哋用十四日走訪咗七個國家十一間大學，重同英國一間院校商討學術結盟。
又唔怪得吳校長咁high，因為浸會工商管理學院最近揚威香港大專商學生聯會主辦嘅最佳工管論文比賽，攞咗第一，打敗一百三十八組對手，真係威。
（圖）浸會工商管理學生攞咗個最佳工管論文獎，得獎同學（左起）利啟燊、廖君翹、陳靜然及陳彤映。
傳真︰2623-9278
電郵︰