快將舉行嘅新一屆瑞士日內瓦車展，除了要留意快將推出的新車，由各家車廠設計師所精心設計嘅概念車亦是焦點所在，就好似大家眼前呢部走概念開篷跑車路線嘅雷諾Wind咁，最獨特之處莫過於車廂鋪排及性能表現。
呢部雷諾Wind概念開篷跑車，廠方特別為其安排以圓潤而流暢嘅車身線條，襯以低斜兼照射範圍甚廣嘅頭燈，同埋獨有車身顏色，就好似占士邦式跑車一樣咁型；至於車廂方面，除空間寬敞闊落，令以2+1模式出現嘅座位配搭，乘客坐進去仍有充裕嘅空間感外，軚盤及腳掣又可調校位置，方便駕駛者進出車廂。
廠方又為此車安排咗一套名為TouchDesign控制系統，駕駛者可透過控制器簡易操作車上嘅導航系統、音響組合等設備，而設於表板上嘅顯示屏幕，更可顯示出各項行車資料，完全係高科技產物。
性能方面，廠方安排一台2.0公升直4偈作骨幹，馬力輸出高達136匹外，匹配埋一套6前速Robotized波箱，表現絕不遜色；跑車化底盤結構，響四輪245/35ZR19高性能輪胎輔助下，行車循迹性亦予人十足信心。