用廣東話寫稿，有時俾人睇低一截，不過呢日（二月二十日信報）睇到陳耀南教授專欄，精神為之一振。陳教授對中文嘅認識，高左丁山一千倍，佢話：「筆者（即陳教授）清楚記得，曾先後親耳聽到余光中、白先勇兩位國語文學大作家說：嚴格而言，國語比起方言，實在蒼白。」
陳教授引用作家韓牧嘅速記，寫低一九九八年世界盃決賽，法國對巴西，廣東話現場評述嘅字眼，共超過七十個與足球有關。用字之豐富，嘆為觀止。左丁山睇真吓，韓牧真係心水清噃，如果將呢啲字翻譯成為普通話，極為頭痛，例如：「扭、批、挑、撩、質、豆、省、熨、篤、掃、剷、搓、線」，動詞多多，生鬼生動。我哋講「施丹扭過卡羅斯，線過波畀比提，再質畀迪西耳，迪西耳搓兩搓，豆過去畀韋拉，韋拉畀李華度飛身一剷……」又或者「朗拿度用心口攞波，一的一豆，左腳狂抽，省中布朗，迪西耳立即撩個波出底線……」嗱，點翻譯呀，請精通國語之士，來電郵賜教。
因睇陳教授鴻文，於是揭一揭陳伯煇、吳偉雄合著嘅《生活粵語本字趣談》（中華書局出版），第三十三頁講「篤背脊」，原來「篤」本字為「 」，《說文》解釋「 」是「擊」，《集韻》「都木切」，廣東話音duk。睇呢本書廣東話字字有出處，自己原來乜都唔識，慚愧之至，一啲連廣東話都唔識之人，久唔久就批評粵語，簡直唔使理佢。