有消息指田二少田北辰同新鴻基郭氏兄弟關係極之親暱，有人甚至質疑二少連自己間舖都搞唔掂，究竟點坐得穩九鐵咁大間公司？八方聽聞慘遭田二少拒絕認係「老友」嘅楊啟彥卻優哉游哉。
原來楊啟彥有一子一女，個仔九七年娶妻，最近為楊家添咗一個男丁，楊官甚為高興，猛咁話對得住祖先。楊啟彥個乖孫叫做皓文，出世時有七磅重，𠵱家三個月大，由於同個仔住得好近，楊官兩夫婦一得閒就去睇吓個孫仔，同個孫玩吓。
八方問呢位港英時代嘅高官適唔適應退休生活，佢話當然唔慣，𠵱家時間多咗，但係一身兼三職，除咗自己份內事，重要做埋司機同秘書，好多嘢要重新學習，包括電腦。好彩楊官重做緊職訓局主席，未至於要一時全退，佢話遲啲就會諗吓同老婆周遊列國歎世界。睇見田二少𠵱家周身蟻，楊官對呢位唔認朋友嘅官場老友，唔知會唔會心涼？
傳真︰2623-9278
電郵︰