曼城可以喺前晚攞咗○四年首場聯賽勝仗，兼且結束埋聯賽嘅十四場不勝走勢，真係要多謝前英格蘭國腳後衞皮亞斯。
話說曼城領隊基瑾見班波喺聯賽贏極都贏唔到，於是喺對保頓之前就搵咗呢位舊將同班球員訓話，希望透過呢位英格蘭名宿嘅感染力，令佢班波啲信心可以返晒嚟。結果，曼城真係反底成功，作客大勝保頓三比一。
其實，有「儍佬」之稱嘅皮亞斯，球員時代非常勇悍，更有打不死嘅精神，而基瑾搵佢嚟同班球員做心理治療，真係搵啱人。
之但係，我求大俠就戥基瑾擔心，驚佢隨時俾曼城炒魷；事關曼城班球員俾皮亞斯講幾講就識得贏波，曼城班高層見佢咁掂，話唔埋會搵佢嚟頂識使錢但交唔到成績嘅基瑾都未定。
假如閣下波癮好大，過去兩日睇足四場直播打吡賽（英超倫敦、英超東北、意甲米蘭同埋英超中部），就肯定過足癮，四場都好激烈，當中三場更好戲劇性，由早入波嗰一隊成為最後輸家。打吡戰真係搏甩髀，四場波入球盤都開「大」，下次再遇到打吡大戰，識做啦！
查爾頓嘅C高爾早前捲入涉嫌強姦案，搞到幾乎一身蟻；但係，佢冇因為咁而學精咗，繼續去蒲吧𠝹女，日前重畀個女仔唱佢大搞性派對。我求大俠都明白後生仔鍾意玩，不過有時真係要適可而止，更何況佢啱啱先撞完板甩身。若然佢有朝一日因為衰鹹濕而入冊，都喺自己攞嚟。
踢波真係有格食格呢回事，好似車路士咁，雖則花咗成億二鎊簽球員，但係今屆同阿仙奴交手三次，三次都輸晒，重畀英國傳媒笑佢哋患咗阿仙奴恐懼症，一見到對方就腳軟；但咁都唔算邪，佢哋重要三場都輸一比二，如果嚟緊兩隊喺歐冠盃碰頭，不妨重槌買阿仙奴贏二比一。
我求大俠睇波咁耐，未見過一個龍門可以喺一分鐘之內入波同失波，但布力般嘅費度做到。前晚對查爾頓，佢喺九十分鐘入波幫布力般追和二比二，點知轉頭即畀查爾頓贊臣射爆，卒之輸二比三。布力般同費度都黑成咁，如果英國都有車公廟，睇嚟佢哋要拜拜神轉運至得。