香港置業麗港城分行經理周淑英話，近排促成單尖沙嘴擎天半島二手成交，可以印證「世界真細小」。
有個觀塘麗港城業主，之前透過香港置業，賣咗收租多年嘅單位，諗住加碼換貨。
佢睇中擎天半島千三方呎單位，打算長線投資。經過多次睇樓，洽購接近尾聲，不過，價錢方面重有些少距離。
代理約埋業主出嚟，再傾吓個價，買家原本準備咗好多台詞，要求業主減價。點知，業主一出現，買家乜都唔講，照價728萬成交，每呎五千六。
買家變得咁爽快，原來呢個擎天業主，正係之前佢嘅麗港城租客。由於佢同個租客多年嚟關係良好，租客從來冇畀過任何煩惱，難得咁有緣相逢，就無謂因區區幾萬蚊破壞友好關係，話唔埋第日再次遇上對方。呢場殺價戰，就咁和氣收場。
發展商新盤減佣，搞到代理行業出現翻天覆地嘅變化，原來背後重有唔少相關行業，都受到影響。
過去代理為咗「打街霸」，需要好多支援，例如穿梭巴士、制服、枱枱櫈櫈、太陽遮同飲品等，𠵱家統統都要cut。
另外，過去佣金高嘅時候，新盤搞比賽，得獎代理都會出錢賣廣告，既可宣傳樓盤，自己又可以攞威。睇嚟日後呢啲廣告都會買少見少嘞。
當然，隨住佣金減少，新盤門口代理雲集，同埋搶車嘅驚險場面都好難再見嘞。
近大半年樓價係咁升，搞到買家追價追到索氣。不過，市場其實仍有啲平價單位可以揀。
好似忠誠地產，月初促成兩個市區住宅單位，成交價都只不過係幾十萬。
其一係深水埗東蘭閣B座低層，四九六方呎，成交價四十二萬，計落每呎都係八百四十七蚊。
另外土瓜灣福安大廈低層，以五十八萬沽出，三九六方呎，每呎一千四百六十五蚊。
當然，呢啲平價單位，樓齡有番咁上下，所以要撞客至賣得出，或者係由投資者吸納。
每個人心目中都有個夢想家居，小朋友嘅，就最具創意同想像力，南豐地產特別為佢哋，舉辦咗個「我的夢想家居」設計比賽，共收到二萬份由幼稚園生、小學生設計嘅作品，其中三百幅入圍，噚日舉行頒獎典禮。
發展商見今次比賽反應熱烈，再度舉行「我的夢想居齊齊做個小業主」活動，各幼稚園生、小學生，都歡迎參賽。不過，今次要用環保材料，造出自己心目中嘅夢想居，希望藉此向小朋友灌輸環保意識，月底截止。小朋友又可以盡情發揮創作意念！
各行各業繼續搞增值，恒基旗下恒益管理，就透過北上採購花卉，提升園藝質素嘅同時，減低屋苑使費。
恒益先喺馬鞍山新港城與大圍翠景花園做試點，去廣州花卉市場，買入八十六箱共二千二百盆花，包括比利時杜鵑、萬壽菊、一串紅、瓜葉菊同洋鳳仙等。扣除運費同雜項，比喺本港買平四成半。
唔知遲吓其他嘢係咪都北上大手買呢？係咁，香港嘅批發商就有難嘞。
蘭西
電郵地址：
