俗語有云：「施比受更有福」，蘋果日報慈善基金喺九六年成立以嚟幫過好多孤寡老弱同埋貧困家庭度過經濟難關，當中受惠人同大使講希望他日有能力嘅時候可以回饋社會，幫番其他有需要嘅人。
日前，大使就收到一位善長送出300套迷你火箭玩具，托大使送俾有需要嘅細路仔，大使同嗰位善長李先生傾傾吓，先知佢囡囡李菁喺兩年前受過蘋果讀者捐助，佢語重心長咁同大使講：「以前屋企經濟有困難，得到咁多人關心，𠵱家我哋生活比以前好咗，唔使再依賴人哋，好希望回饋社會；今個農曆年就同啲阿哥、細佬借錢喺維園搞個年宵攤位賣火箭降落傘，嗰陣有個心願係希望貧窮小朋友都有一套火箭玩，開心吓，噚日終於將批玩具捐出嚟達成呢個心願。」
今年二十二歲就讀大學嘅阿菁因為自小患有深度弱聽，需要購買價值一萬六千多元嘅全數碼助聽器，但當年李父冇能力負擔筆錢，經本報報道之後，好快就有善長捐錢畀阿菁買呢部助聽器，對佢以後學習同埋溝通都有好大幫助。
大使知道唔少受惠人都有做義工幫番其他人，或者積極搵工自力更生，所以，蘋果善長嘅慷慨援手，除咗幫助呢班貧窮人士度過經濟逆境之外，最重要係令佢哋感受人間溫暖，懂得回饋社會。
暖流熱線
電話：29908688
傳真：23702192
電郵：
網址：