愛國大罵戰，國家愈罵愈激，中央電視台高調播出老鄧講話，聲稱治港者一定要係「愛國者」，要「尊重自己民族」。有人好天真咁認為，請出鄧公解畫，胡溫係想「愛國」問題嘅罵戰降吓溫。
不過，接近愛國勢力嘅人士就唔係咁解讀。胡溫雖已拒絕○七直選，但九月立法會，香港人重會搞對抗，選好多民主派入局。為咗阻嚇香港人唔好再選李柱銘，胡溫中央又點會想𠵱家將「愛國口水大罵戰」降溫？啱啱相反，係要升溫。一不做二不休，趁咁嘅機會，四四六六講清楚：乜嘢叫愛國，順從胡溫旨意、反對○七普選、反對○八立法會全面直選、兼帶頭鬥臭李柱銘、司徒華、劉慧卿、長毛等人嘅，先至係愛國。
唔怪得近日民建聯亦收到風，加入重點批鬥行列，民建聯主席馬力點名吳靄儀，話佢唔係中國人，冇資格入立法會論政。另外香港電台親中名嘴劉廼強亦狀態大勇，啄住何俊仁唔放，一口咬定李柱銘係美國無間道。祖國呢啖氣忍咗七年，今鋪一定要一Q清袋大晒冷，唔止係踩熄直選火頭，重要截擊九月立法會選舉民主派大搶灘。
呢一場愛國整風運動，重要進一步深化，因為今年嘅鬥爭極其「嚴峻」，係自從十年前批鬥肥彭之後嘅最重大戰役。𠵱家先至開波，又點會降溫？愛國要人人審查，人人過關，就算政府高官，邊個多口話「唔好爭論愛唔愛國，集中做好政制諮詢工作」，用「香港人大多數愛國」嚟搪塞嘅，都係反中亂港勢力同路人！
例如，安民上星期訓斥香港人，唐唐坐喺側邊，笑騎騎話「冇補充」。本來佢嘅反應好啱。可惜第二日唐唐被記者追問「愛國是否即係愛黨」，唐唐竟然話「呢樣係安民部長嘅意見」，佢自己就認為「香港人大多數愛國」，咁就係犯咗大是大非不清嘅原則性錯誤。
即是話唐唐唔同意「愛國即是愛黨」，關鍵時刻縮骨，間接將安民亦即國家擺上枱，做下屆特首機會大大減分！
有愛國人士好不滿地指出，煲呔同林公公，亦係主張「愛唔愛國不要爭論咁多」嘅中間動搖分子，妄圖大事化小，佢哋未讀過我國文化大革命史，當初毛主席要搞文化大革命，提出批判歷史劇「海瑞罷官」，劉少奇同北京市長彭真，當初都想大事化小，話文化大革命大批判只係局限於「學術範圍」，企圖阻撓主席揪鬥黨內走資派，收尾連自己都變埋反革命及階級敵人。
消息靈通嘅愛國人士話，現時呢一場愛國大爭論，係一件好事，好就好在唔止鬥臭李柱銘等，重可以在政府高官及中間派之間引蛇出洞，邊個真愛國、邊個假愛國、邊個三心兩意愛國；邊個把口話愛中國查實內心重暗暗眷戀英國，喺呢場愛國大整風運動之中，呢啲人嘅真面目都會一一暴露，例如有啲人想草草收兵，話英文《中國日報》評論唔代表中央，又話要盡快展開政制諮詢，真係笑話！乜《中國日報》係民間報紙咩？港澳辦副主任徐澤已經訓示曾蔭權，先要搞清楚原則，再講程序。愛國就係最高原則，唔界定清楚，邊個敢賊膽包天，開波諮詢？
八方反思吓，覺得愛國人士嘅指示好有道理。唐唐犯咗錯誤，政府高官好醒定啲，最好日日返工，着套藍色解放裝，檢討吓自己嘅愛國思想有冇跟上最新形勢嘞。
傳真︰2623-9278
電郵︰