民政事務局局長何志平噚日同太太胡慧中，主持粉嶺蓬瀛仙館觀音殿開幕禮，遲到半個鐘，問何局長搞乜遲大到，佢手指指要老婆解釋。胡慧中就話：「個女詐嬌，着晒衫，係都話要跟埋嚟，搞到我兩公婆唔出得門口。」何局長忍唔住插嘴：「我老婆話帶埋個女嚟，不過人哋冇請佢，唔係咁好。」結果胡慧中應承買零食同請埋班朋友仔同個囡囡玩先可以甩身。
蓬瀛仙館嘅觀音殿，尊奉一位「慈航大士」為「送子娘娘」，難怪胡慧中隨夫踏入觀音殿上香，都喺呢個一點三米高嘅漢白玉觀音面前拜一大輪。係咪想同局長生多個仔？胡慧中笑住話：「如果得償所願，一定請你哋飲。」唔怕，舊年肥平去車公廟求籤奇準，證明中國式嘅滿天神佛鍾意關照肥平，呢個仔，胡慧中生硬嘞。
（圖）胡慧中拎住個LV袋去蓬瀛仙館主持觀音殿開幕禮，順道參拜送子觀音。
張志華攝
傳真︰2623-9278
電郵︰