犯事入過男童院的阿邦，○二年底在社工引介下加入基甸少年軍訓學校寄宿。他親身經歷黑社會滲入學校，慶幸今日終於遠離「打生打死唔知為乜嘅日子」。
撰文：李慧玲
攝影：張家俊
最近新聞日日講校園暴力，其實我都試過打同學。我以前跟過黑社會。
十二歲嗰年，升中一。當時好多電影講黑社會人物，好似《古惑仔》裏面嘅浩南。我覺得跟大佬好威，起碼打架有人撐，於是同學校嗰班人傾多兩句，幾夾，就friend咗。
………………………………
學校打架，通常係睇對方唔順眼，有時見邊個「儍仔」日讀書夜讀書，就撩下佢，佢愈發脾氣大家就愈開心；但如果搞到七、八個打一個，就一定有恩怨。
好似二千年聖誕節，一班朋友在旺角玩，同人有拗撬，後來知道對方係同校，第二日凑齊二十幾人在學校打佢哋四、五個。點知對方都好厲害，打到流血重繼續打，直至訓導主任喝停。過多一日，反黑組就來學校調查。
………………………………
跟住嘅日子，我繼續鬧事。中二，終於入咗男童院，我由一個本來自由自在嘅人，變成去廁所要問准，用幾多格廁紙都要有規定。我好辛苦，晚晚都喊，諗過要自殺。
出來後，我覺得自己衰咗，無面目見人。舊時嘅朋友搵我，我都唔想見。
有一次，我遇見一個小學同學，佢爸爸開水電工程，見我無所事事，就叫我到舖頭幫手。佢哋兩父子同我非親非故，都咁主動幫我，令我開始感受呢個世界會有真正嘅關心。
………………………………
兩年前，我被社工安排入基甸少年軍訓學校。學校規定夜晚十點熄燈瞓覺，但阿Sir隨時凌晨兩、三點叫醒你去墳場跑步、抄墓碑。最初，我真係𤷪到想用菜刀斬阿Sir，但佢好叻，無鬧我，堅持說服我起身。佢講，你現在可能覺得學呢樣嘢無用，但將來可能發覺有用。我諗，我入來都係為咗將來，於是，我捱住眼瞓都要起身。
我開始感受到自己學會堅持、毅力。最近一次兩日兩夜行山訓練，我堅持行完全程，到達終點已經凌晨四、五點接近天光。我諗到：好多人都無放棄我，我一定唔可以放棄自己。