引用鄧小平發言，並非任何人專利，只要揭開鄧小平文選，就可以各取所需，各說各話。𠵱家啲保皇黨猛講鄧小平，只引用「誠心誠意擁護祖國……」對鄧小平講過：「也可以罵共產黨，共產黨是罵不倒的」……大家最好翻閱原文，消消毒。
大記者年紀輕過林瑞麟，但如果俾蕭蔚雲問起：「起草基本法時，你在哪裏」或類似問題，大記者就可以答：「當時就係採訪草委會新聞！」以佢多年經驗，覺得今次政改之爭，幾似當年棒打彭定康，政治上猛咁鬧，經濟呢？咦，中國社會保障基金、保險基金都放出聲氣，可以嚟香港買股票噃，大記者將兩件事串起嚟，就得到初步結論：「必有大量熱錢流入，逼爆股市，等香港萬人騰歡，九月份情願去排隊買樓，唔去投票！」
係唔係呀？股民唔去投票，投票率必低，民建聯鐵票出動，咁就可以掃低泛民主派，不過大記者話：「都有一個變數嘅，就係民主派可以出動鄔維庸、黃宜弘、曾憲梓拉票，最好就係請呢三位仁兄出席政改論壇，重請埋徐四民做論壇主持，如此一來，有線新聞一台會現場直播，新聞二台不斷節錄播出。啲選民聽完、睇完，重唔蜂擁上街，投民主派一票乎！」
條橋就幾好，不過鄔黃曾徐四大民主派拉票天王未必肯制，而且中聯辦分分鐘會請咗四大天王去國內遊山玩水，過咗選舉先至返嚟！大記者咭咭笑：「佢哋肯回國遊覽，民建聯會畀晒錢！」