大市炒到現水平，大部份股票都升得相當多，除咗走去抽新股之外，究竟重有乜嘢選擇昵？經紀黃叫小初留意超大現代（682），話隻股可能翻炒。
金手指自從在去年大手買入超大之後，超大股價表現簡直係脫胎換骨，而且過往對民企股帳目的疑慮，已經再冇人提起。上個月超大更成功集資，以先舊後新配售2.8億股，每股作價2.50元，集資淨額6.83億元。
超大在批股之後，股價一度上過2.95元高位，但大部份時間都在2.60-2.70元水平橫行，企硬喺批股價樓上。公司高層早排頻頻會見證券界人士，當中都包括唔少外資大行，部份重上過福建生產基地做公司採訪。
經紀黃話，證券界上完去之後，反應出奇地好，並讚超大搞農業耕種夠晒現代化。有間美資行，上周重出咗份報告，調高目標價至4元。
超大上周五微升唔夠1個巴仙，收2.725元，成交股數465萬股，金額1266萬元，比起大行目標價，似乎重有一大截。
慕容小初