多間車廠已先後公布將於今屆瑞士日內瓦車展上展出多款新車，同樣係來自歐洲地區嘅愛快汽車，亦不甘示弱，響日前宣布會於車展會場內，展出全新兼用上四驅設計嘅156Crosswagon，是一部具備四驅越野功能以及Wagon旅行車實用性嘅Crossover車種。
從外形而言，新車與現有156Sportswagon，除了兩者都擁有圓潤而流暢嘅車身線條，為要適合行走一啲崎嶇嘅路段，故此喺換上四輪225/55R17全天候輪胎嘅同時，廠方又將部車嘅離地距提升，以配合不同地勢路段。
至於車廂方面，亦務求令其與原來嘅156Sportswagon有分別；當中新車嘅中控台及表板鋪排，皆屬新配搭，車內座椅更用上高級真皮鑲嵌，承托力高之餘又有手觸感，而且車上多套安全帶及安全氣袋，喺堅固車架結構輔助下，絕對能為車上乘客帶來充份嘅保護！
至於引擎配搭方面，廠方特別為新車安排一台1.9公升JTD柴油Turbo偈，呢台引擎不但能為車輛提供高達150ps/4000rpm馬力，更會響引擎處於2000rpm時發出高達31.0kgm嘅扭力峯值，性能表現可謂毋庸置疑。經過強化嘅底盤結構，匹配一套能切合不同路面環境嘅四驅系統，行走任何路面都無有怕，而四輪高效能煞車碟，喺多套電子系統，如ABS、EBD等輔助下，制動表現亦予人十足信心，這款156Crosswagon可謂內外兼備。