國企指數上周先高後低，但全周合計仍有進帳，上周五重返5千關口，報5007，本周有機會再做好啲，中企指數Call輪可以炒吓。
社保基金來港投資嘅計劃，據報已獲國務院批准，雖然初期投資額不大，但呢個只係北水南調第1波，此後1波1波又1波，陸續有來，國企股必然受惠。
中企Call輪有兩件比較抵食，9363現價45仙，溢價0.55%，槓桿率4.8倍，6月29日到期。另一件係9366，溢價稍高都只係0.85%，槓桿率有5.9倍着數番，6月9日屆滿。呢兩件輪都抵玩，但9366交投欠活，要扣分。
想爆炸力大啲，9442可以諗吓。呢件係窗口輪，但已過「窗口期」，變番標準輪玩，現價15.4仙，溢價8.2%，槓桿率8.1倍，玩到7月29日。呢件實在唔平，勝在交投非常活躍，啱炒出炒入。
佔國企指數最大嘅中石油（857），現價4.1元，中期上升軌、20日線同50日線滙集於3.95-4元區域，唔易跌穿，近期高位4.275元有機會升破。不過中石油Call輪唔易揀，一係太價外，一係數據唔靚，稍為好啲嘅係9405，6月21日到期，現價49.5仙，溢價6%，槓桿率8.3倍。
章 盛