雖然平治Viano尚未有抵港嘅消息，但向來以改裝平治汽車而聞名於世嘅Brabus，就經已為其推出改裝版本，不但響外觀及性能表現上有所改動外，就連車廂布局亦要來得豪華，而且重可以演化成一個流動辦公室㖭！
介紹外觀及性能前，必先要講講個車廂，改裝版不但加有高級真皮座椅，同埋金屬腳踏及門鎖，車內更可安裝辦公桌，將座駕變成流動辦公室；除此之外，用家又可以選擇加入一套高級DVD影音系統連兩部14.1吋LCD顯示屏幕，咁就算要長途行車，都唔怕悶啦！
外觀方面，經Brabus改裝後嘅平治Viano，特別加裝有全車包圍配件，當中包括一體式車頭泵把連整流器，以及車身兩側裙腳等等，襯埋原廠Brabus18吋跑車合金胎軨，同埋電鍍跑車尾喉，夠晒型仔！
至於引擎配搭，Brabus特別將頂級Viano3.2公升版本嘅引擎，容積增加至3.8公升，馬力輸出數值不但由原來嘅218匹，增加至300匹，就連扭力輸出亦達至40.3kgm/3800rpm，難怪改裝後0至100公里加速度僅需7.5秒，而極速更達230km/h咁快啦！與此同時，廠方亦有為最受車迷歡迎嘅2.2公升CDI柴油Turbo引擎版本，推出BrabusD3(II)引擎改裝配件，加裝後能令輸出增至177匹，0至100公里加速度只需10.6秒，極速更達180km/h咁快㖭！
