八方噚日入沙田睇馬，八到一條料，就係中銀前總裁劉金寶即將被馬會踢出會，據知馬會已經出咗通告，話劉金寶欠交一啲款項。依照程序，好快就冇得做會員。其實，佢重有乜法子交番啲錢呢？
去年五月，劉金寶突然被召上北京，之後就人間蒸發。香港中銀由和廣北出掌，但劉仍在總行掛名做副董事長。中銀自己做完調查，監管機構又話查過，但發生乜嘢事，大家都講唔清楚。直至上個禮拜，劉在總行個職位始正式被免。呢單嘢，雖然中銀已經處理得好好，但話冇影響香港金融中心聲譽，就呃鬼食豆腐。
八方上周收到讀者J.H電郵，話如劉金寶之類人才，咁樣被人整死，令人扼腕；八方亦深有同感。
傳真︰2623-9278
電郵︰