猶記得十多年前，香港有電視台引入首部立體電影，大家帶住個紅、藍色立體眼鏡，嗰個半頭雖然睇到眼都花，但嗰種視覺衝擊真係一生難忘！最近新出嘅1區DVD《非常小特務3D立體出擊》，以全新數碼科技加高解釋度影像，拍攝新一代的立體電影，就技術同立體感，當然不可同日而語啦！連DVD多送一隻3DMiniGame，真係抵玩到頭暈！
記者、攝影：朱崇德
彩色立體電影，早在50年代初已經面世，不過睇過早年立體電影嘅人，都難免有種影像鬆散、同頭暈目眩感覺！《非》使用了最新的數碼拍攝科技，結合於立體電影製作上，全片100分鐘拍成全立體電影，在影像質素方面，真係達到好大的改善。
基本拍攝原理，同人的眼球原理相近，以2部攝影機同時拍攝，再經電腦的準確合成製作，大家只需佩戴上隨碟附送的立體紅、藍眼鏡，就可以模擬出人眼的立體視覺效果！論立體感，真係好明顯分到前景同後景，再加少少立體紋理，配合電影裏的超現實機械設計，真係非常匹配！
就筆者試睇觀感，睇呢套立體電影，最好配投影機的超闊屏觀賞，立體感會出好多！如果如筆者家裏只有29蚢q視機仔，3呎近距離觀賞，都可以做到唔錯效果！如果嫌立體電影要成日戴「立體眼鏡」太煩人，除咗Disc1嘅立體版外，Disc2重另備有2D畫面嘅普通電影版，真係相當體貼！另外，《非》的影像聲畫表現唔錯，由於勁多賽車及打鬥場面，1.85:1闊屏加DolbyDigital5.1聲效，都真係幾好炸！
故事內容方面，今次電影主線放在小特務Juni(戴路沙巴拉飾)身上，弟弟為了營救被禁錮在虛擬3D遊戲內嘅家姐Carmen(雅麗莎維嘉飾)，冒險潛入全球最受歡迎的電玩遊戲之內，對抗專為克制她們而設計的奇異怪物；電影內打鬥場面頗多，最搞笑係玩轉《星戰前傳》，又有太空賽車，又玩對戰激光劍，雖然左抄右拼，整體頗熱鬧，一家大細都啱睇！
不過1區版令人唯一感到不足者，就係少咗勁搞笑嘅港星配音，相對遲些時間推出的3區港版，又有中文字幕，又可能會有香港戲院上畫時的劉德華、吳鎮宇、阿SA、阿嬌、吳君如、杜汶澤等作幕後配音，亦令人期待度甚高！
Disc1多送咗一隻3D賽車MiniGame；遊戲背景正正是電影裏的太空賽車，玩家就飾演小特務Juni作左衝右突！遊戲平台亦好方便，大家只要利用DVD機的4個方向鍵，跟住畫面標示嘅方向提示㩒掣，就可以過關斬將，小朋友應該玩得幾開心！
DVDPRO
電話：23326326
地址：旺角奶路臣街6E德發商場地庫B4舖