新一屆瑞士日內瓦車展舉行嘅日期，日漸迫近，各大車廠都爭取時間，將旗下會於場內展出嘅新車款搶先曝光；其中最積極嘅，相信非德國平治（Mercedes-Benz）汽車莫屬，繼於早前宣布會展出Facelifted新版C-Class，同埋屬第二代嘅全新SLK開篷跑車後，佢哋又公布會展出全新CLS車系。
走豪華Coupe轎跑車路線嘅平治CLS，不僅線條設計勾劃出現有平治汽車嗰份豪邁氣派，圓潤而流暢嘅車身線條，重顯現出一份跑車氣息；而用上四門及低重心設計，更為乘客上落車時帶來不少方便㖭！
至於車廂方面，不但空間來得寬敞舒適，以高級真皮鑲嵌而成嘅前後兩排座椅，乘坐既妥貼又舒服，襯以車廂四周高級桃木修飾，豪邁氣派之感盡在不言中，設備配搭亦見齊全易用㗎！另外，廠方為新車安排有兩台引擎供選擇，當中包括CLS350所採用嘅一台V6引擎（272匹），以及CLS500所採用嘅5.0公升V8偈（306匹），以切合不同用家需要。想知多啲關於呢部CLS資料嘅車迷，就要留意我哋日後嘅報道喇！