59歲的詹培忠有兩名兒子，長子為美輝證券東主之一的詹劍崙，次子詹劍嶠是建星環保（8011）創辦人、大股東兼主席，「牙擦詹」如何教兒子呢？
「老竇唔好以為個仔好叻，嗰仔亦唔好以為老竇好有錢，否則大家累鬥累。𠵱家唔使孝敬上一代嘅，最緊要一代顧一代。你能夠照顧到下一代令父母冇擔憂，已經盡咗責任。冇理由要一個人照顧幾代人。冇俾壓力佢哋，由得佢獨立自主。當然，你勤力啲遲早發達，但冇人可保證，要自助人助，你自己去拼啦，冇就唔怕輸，有就要怕輸囉，不過知驚就冇發大達。」
詹培忠覺得長子炒股票是「另類叻」，指他記性好，「炒股有佢一套，但做股票搵錢易養懶人，財技亦要變通，只要捕捉到一個機會就可以發達，問題係要鞭策自己，人哋去跑馬，你唔去咪着數好多，亦慳好多錢。」
至於次子，處事十分低調有如神秘人，甚至建星上市儀式亦不願現身。「佢唔出嚟，𠵱家股價升到一拆五都係咁。佢話：『我都冇錢，啲股權冇用（受限制現不能沽售）。』人哋唔知以為建星係我嘅，查實我都未去過佢間造紙廠，聽人家講好唔錯嘅，去到雲南重要坐6個鐘車至到昌寧縣，但佢肯去捱苦，我冇佢符，𠵱家啲青年冇人肯啦。」
另一邊廂，詹劍崙則認同父親好叻，對他們沒有壓力，只要求大學畢業，有正當職業。但子承父業的他似乎對金牌莊家始終有點敬畏。他笑說：「你同佢講啦，我唔敢講佢呀！」