爭人周身債、重俾人告侵犯男童案嘅米高積遜（MichaelJackson），早前同二十一歲法國籍靚女譚美（JoannaThomae）傳緋聞。從來都冇現過身嘅譚美，日前接受美國電視節目《EntertainmentTonight》訪問，言談間默認同米高拍拖㖭。
細米高二十四年嘅譚美，原來自小係米高嘅fans，佢肯離開法國去美國住，完全都係想親近偶像。譚美日前接受訪問時，首度公開佢同米高嘅戀情，佢直認同米高有「特別關係」，而且大家都好關心對方。
當主持問到佢同米高究竟有幾親密，譚美直認話：「我哋真係好親密，我哋接過吻，不過其他私人嘢我唔講。」譚美講呢番話嘅時候，嘴角重流露住甜絲絲嘅笑容，我羅拉都戥佢兩個開心。其間，譚美重承認同米高瞓過同一張床，不過大家唔好心邪，譚美話佢哋一齊打機啫。金髮藍眼嘅譚美都可以話係一個靚女，米高今次真係執到。
另外，最近有傳米高入咗科羅拉多一間戒療所醫病，不過米高嘅發言人前日出嚟否認，話佢哋去科羅拉多，只係陪仔女滑雪。