新車速報：<br>本田Accord特別版裝身變跑格

新車速報：
本田Accord特別版裝身變跑格

新一代本田Accord自打入本地市場以來，漸為用家所受落，銷量更穩步上升；惟代理為要進一步刺激銷路，近期更替車系引入包圍配件，除以極吸引售價促銷Accord2.4Trendo及Accord2.4Potenza特別版外，一套Potenza配件更可以額外加裝於3.0V6嘅Accord身上，匹配本身超卓嘅性能演繹，可會是現今當時得令嘅轎跑車新貴呢！

記者、攝影：陳偉林

DressUp新版Accord車系參考價
1.Accord2.4Trendo$229,880
2.Accord2.4Potenza$232,880

註：若選購3.0V6型號（$299,000），可額外付$3,000，加裝Potenza車頭氣霸及車尾定翼（裝工及噴油另議）。

■Potenza版包裝來得惡形惡相，烘托有一份跑意。

■鑽石型頭燈加有原廠霧燈配搭，既明亮又醒目。



賣相變得跑格鮮明
雖然本田Accord給塑造成一輛不折不扣的豪華轎車，惟部車本身低斜嘅車首外形，加上一對炯炯有神嘅鑽石形頭燈設計，早已滲透出一份富活力嘅跑車氣息，現加上Trendo車頭氣霸，又或者Potenza嘅新版車頭氣霸及車尾定翼配件，令原來呢部四門轎車，登時變得跑意盎然，活現出一份純悍轎跑車氣息㗎！

■門邊電鏡加有方向指揮燈，閃爍有吸引力。

■Potenza版尾定翼渾然一體，別具穩壓安全感。



豪華座艙坐得舒適
講到車廂陳設，前後兩排均以上乘嘅真皮鑲嵌，乘坐妥貼舒服之餘又見承托力十足，而前排更備有全方位電控，高級3.0V6版本後排之間，還置有大型中央手枕，除內附杯座外，重有活門直通尾廂，以方便提取物件呢！
再者，設備除電窗、門邊電鏡及電天窗外，還有原廠高級音響同恒溫冷氣系統，當然少不了重有安全氣袋等配套啦！

■車廂陳設氣派出眾，重有一份豪邁吸引力。

■Trendo版嘅新設氣霸較斯文，好切合普羅車迷嘅口味。

■前後兩排高級皮椅，乘坐貼身舒服。



懸掛出色可靠安全
同系兩款型號之中，筆者較欣賞會係至頂級嘅3.0V6型號，輸出強勁又突出之餘，匹配一套5前速自動波箱，起跑加速表現出色又順滑，而四輪富跑格嘅懸掛設計，加上頂級版置有主動式TCS系統，不但有高循迹演繹，四輪高效能碟煞裝置，還輔有ABS及EBD組合，更帶出多一份安全同駕駛樂趣㖭！

■液晶體表板鋪排，井然清晰。

■渾然一體嘅中控台，內置有原廠高級音響及恒溫冷氣，下方更設有大型儲物匣，就手方便。



記者短評：加Kit後型到爆！
新版Accord仍予人一份成熟斯文味道，家陣代理引入DressUp包圍配件，令新車賣相登時變得有型富跑味，加上同系2.4公升及3.0V6版本同樣有出色操控跟性能演繹，教人一新耳目的清新感覺；而豪華舒適嘅車廂鋪排，更成賣點之一呢！

■一套5前速自動波箱，轉檔既靈巧又順滑。

■後排之間備有大型手枕內置杯座，重有活門直通尾廂。

本田Accord3.0V6規格
引擎：2997ccV6SOHCVTEC
馬力：240ps/6300rpm
扭力：29.3kgm/6300rpm
傳動：5前速自動波，前輪驅動
懸掛：（前）雙搖臂（後）五連桿
制動：（前）透氣碟（後）碟式（ABS）
輪胎：205/60R16MichelinEnergyMXV8
尺碼：4830×1820×1455mm
軸距：2740mm
車重：1545kg
新車售價：$299,000（標準版）
車輛提供：合群汽車（23802231）