民主派有八字真言
「（07年）最多爭取到增加多10個直選議席。若係三分之二立法會議員同意呢點，特首都冇所謂……還政於民就係呃人嘅，事實上𠵱家亦係還政於民，只不過董建華做得唔好之嘛，何厚鏵唔係做得好好？
「佢（中央）已經俾咗你，之不過呢個『民』嘅代表做得衰，其實民主派唔係咁簡單，佢有八個字，（詹從西裝袋掏出記事簿，指住八個字），事實上佢哋講咗四個字，後面四個字唔敢講之嘛，呢八個字就係『還政於民主派人士』囉！不過，佢哋最終都係為選票，你估為乜呀。」
董特首最失敗急改架構
「董生係一個缺乏魄力嘅人。佢最大一個錯誤，係香港政府嘅架構經歷咗150幾年，你霎時間要轉模式唔係咁輕易嘅。嗰啲所謂處長、秘書長會唔會咁落力幫你同局長配合呢，未必；有功勞你（局長）攞，做到死死吓係我，我睬你都儍。」
詹培忠字典無「怕」字
「蔡太話佢嘅字典上冇個『輸』字，𠵱家咪輸得好慘，我嘅字典上冇個『怕』字，我好大膽，好奇怪，我乜嘢事都未驚過，細過喺大陸係地主仔，好百厭，從未驚過。」「我夠膽出嚟選，你哋（指政府）嚟同我對抗？即管嚟囉！」
最敬重莫應基具情操
「最佩服邊個？好難講，以呢個業界計，對大家非常非常有貢獻嘅係李福兆，佢爭取1969年搞遠東金銀交易所；係呢個業界最有情操、最敬業樂業嘅係莫應基，呢啲人係好值得敬重。當然，香港呢個社會成者為王敗者為寇，但始終有冇錢係另一回事，做人最緊要係有冇格。」
「潮州怒漢」形象係錯覺
詹培忠被稱為「潮州怒漢」，他說：「其實我幾時有好怒，我冇，最唔好嘅係個死人電視機，一照落去就冇頭髮……
「雖然我嘅形象唔係好標青，但你睇我幾時有緋聞，咁多年我都好正派，我把口衰要鬧人，鬧人一俾人捉到重會放過你？
「俾人感覺係牙擦啲，自負啲，但係你對自己冇信心，人哋何來對你有信心呢？」