《短線遊》介紹過唔少奇形怪石，不過多數似動物、人面，今次呢嚿奇石勁搞笑，包你估唔到似咩……開估嘞！就係「馬桶石」嘞，位置喺西貢「榕北走廊」尾段，外形圓圓哋、中間有凹位，勁似你同我屋企個馬桶！
記者：陳震霖
攝影：陳盛臣
模特兒：Iren、Jenny（SunSpot）
北潭路出發，入復興橋，南行20分鐘，先睇上窰民俗文物館。
話說19世紀末，原居於廣東省新安縣的客家黃氏兄弟，遷入北潭涌定居，佢哋勁有生意頭腦，開小店畀村民同過客小歇，之後建立上窰村，喺3米高平台起1座約10尺深石灰窰，生產石灰作為建築材料同肥料。當時嘅上窰村有8個房舍，包括住屋、更樓、豬舍、牛欄和曬坪，村民好聰明，自設地下排水渠，動物糞便亦唔浪費，會經排水渠流入收集缸作肥料備用。
到1981年，上窰村同石灰窰被列為法定古迹，最後經東華三院撥款重修，再搜集村內農具，1984年重開成為上窰民俗文物館，館內有資料圖片介紹昔日播種、插秧、灌溉、收割等種米過程，農夫種米，果然粒粒皆辛苦。
上窰民俗文物館（27926365）
開放時間：星期二休館，其餘日子9:00am至4:00pm
入場費：免費
行完文物館，原路折返北潭路，見有路標寫住「郊野樂行」4字，旁邊山路就係「榕北走廊」入口。走廊全長11公里，大致可分成3段，第一段係村民打埋嘅果園，左右兩邊種滿香蕉同芒果，Iren同Jenny睇到流晒口水，沿途向左望，發現2幅荒廢梯田，田後破落村屋三數間，相信以前唔少村民喺度耕種為生，不過𠵱家已經生滿雜草，人都唔多個，反而益咗牛牛，成為佢哋嘅覓食地。
再行，見分叉路口，沒好搞錯，一邊上嶂上平原，行另一邊向榕樹澳進發至啱，路口附近望向左，鼎鼎大名嘅雷打石山是也，山上零零舍舍有2嚿巨石，一前一後好似兵捉賊咁碌緊落山，齋睇都覺得過癮。過癮完就唔該有心理準備，因為之後係一段光禿禿嘅超斜上山路，Iren同Jenny試過，行到氣咳。
辛苦嘅上山路段已經過去，進入第二段落山路程，先穿越大小叢林，再踏高低不一石階，之後會出現大大小小嘅溪流，陣陣涼風吹埋身邊，好涼爽。如果嫌石階路太易行，無挑戰性，大可以唔行大路，沿石溪走一段過吓跨石澗水癮，行到熱，攞溪水洗個面，精神一振。
再行30分鐘大路，右手邊有一明顯落澗小路，直落小路，「馬桶石」即時出現眼前。可能之前幾日落過吓雨喇，有雨水積聚喺凹位度，遠望反晒光咁，十足十成個馬桶，後面1塊方形大石就似水箱，只欠缺沖水手掣同廁所板，唔知有無人以為真係馬桶，踎喺上面解決呢？睇完「馬桶石」，行多10分鐘石板路，已經到達榕樹澳。
到咗榕樹澳，進入最後第三路段，沿引水道往水浪窩方向走，全程平坦馬路，中間有2個郊遊休憇處，不妨在木椅上小休片刻。休憇處所在屬高地，近六角亭一隅對開有無敵大海景，企嶺下海盡收眼底。再15分鐘路程，出西沙路，「榕北走廊」行程正式完結。
出番西貢市，不妨去佳記小食整番幾串小食醫肚（$5至$10不等）。唔夠飽，整番碟炒粉麵飯先出市區，推介五香肉丁豆腐飯、印尼炒飯、XO醬叉燒炒飯（$12至$22），大大碟鑊氣夠。
佳記小食
地址：西貢巴士總站福民路74號
