任達華和名模琦琦於九七年結婚，今年已踏入七年之癢。平時兩夫妻各有各忙，但見他們仍然恩愛如昔，究竟二人怎樣維繫感情呢？
任達華說：「我哋日日都好似有新婚感覺，感情歷久常新。不過有時聚少離多，我會成日同佢傾電話。琦琦教曉我用手提電話傳短訊，佢重專登買咗部新電話畀我，有埋手寫板。
「等遲啲3G網絡喺世界各地都完善時，我會即刻買兩部，方便大家溝通。」
任達華視《PTU》DVD為傳家之寶，究竟他和琦琦何時才製造愛情結晶？他說：「喺我心目中，琦琦係一個『大BB』，至於幾時生『細BB』，呢啲要問佢，我要等佢冇咁大心理壓力先，而且呢樣嘢需要雙方準備，但基本上我哋好鍾意小朋友，𠵱家我都助養咗好多細路仔。」
任達華早年喜歡在世界各地置業，在香港、內地、新加坡、泰國、馬來西亞，甚至美國和英國都有房子，但近年世界經濟不景，那他的房子豈非全變了負資產？
任達華說：「好彩喺九七年前，我將馬來西亞、新加坡、泰國同紐約幾間屋賣晒，𠵱家只淨番香港、英國同內地有屋，香港嗰間一早做咗負資產，但好多香港人都係負資產。」
提起「負資產」三個字，任達華感受良多地說：「自阿爸喺我十一歲嗰年死咗，佢冇留低過乜嘢身家畀媽咪、我、阿哥同細妹，嗰時我已經係『負資產』。𠵱家咪一樣生活得好好，每個人最緊要係有份工。」
