呢排好多公司排住隊公布業績，好似前個禮拜東亞銀行（023）派完成績表後，上個禮拜又輪到渣打集團（2888）。睇番銀行股業績，由於舊年香江經濟由谷底回升，無論係樓按或者商業借貸都明顯好轉，加埋呆壞帳減少，所以銀行股絕對有機會跑贏大市，班芬佬紛紛轉軚全面睇好。
有個做開基金「買手」嘅行家話，班芬佬對滙豐（005）嘅業績睇得好好，話3月初公布嘅盈利有機會達到100億美元，即係話較之前一年增長60%。佢重話，啲大戶為咗要執平貨，更不惜工本喺美國ADR市場砌低滙豐個收市價，再上下其手推低埋期指，等第二朝可以喺香港呢邊執平貨，所以上個禮拜四滙豐個ADR價無喱頭咁跌咗兩大蚊，但第二日又即刻升返上嚟。
如果照個行家咁講，滙豐公布業績當日，就正係「大笨象」變身「小飛象」嘅大日子，大家如果要買平貨，不妨跟住呢班大戶搭轉順風車。
呢輪做分析員嘅朋友好唔得閒，除咗要為就快公布業績嘅大藍籌作最後賽前預測外，加埋新股又再活躍番，令到佢哋分身乏術。有部份分析員重要幫公司應付埋啲配股，好似伏勝某個喺間坡佬公司做分析員嘅朋友甲咁，就話因為要同某隻地產股配股做好準備，於是要寫到佢有咁好得咁好，一時又話佢哋土地儲備充足會受惠地產市場復甦，一時又話佢哋會喺CEPA落實後，帶動租務市場，總之所有法寶都出動晒。
究竟係邊隻地產股準備批股，提示係大家不妨諗諗邊隻有番咁常下晒士嘅地產股重未集資就知啦。
伏勝