滙豐大班艾爾敦，繼早前發表樓市降溫論，被讚譽為有良心賓架後，噚日又化身愛心賓架，喺獅子行總行向近百位小朋友講古仔，推動學童英語水平，就連天王巨星楊紫瓊亦捧場，聽到興奮處，Michelle恍如小影迷般歡呼拍掌，又同小朋友搶住答問題。
故事講一個叫Charlie嘅小朋友，喺嫲嫲生日送上神秘禮物──心儀偶像嘅演唱會飛，內容既溫情又刺激。平日暢論金融經濟嘅敦哥，原來講兒童故事一樣掂，七情上面，又玩埋角色掉換，講講吓突然變身古仔入面嘅銀行teller（櫃位服務員）王先生，接聽主席來電，搞到班小朋友笑到肚都攣，難怪講完古仔後，個個黐住大班簽名合照，有個小女孩重同八方講話敦哥係佢偶像。
首次公開講古，敦哥話感覺興奮，蓋兒女長大後，此調無彈久矣，今次重私下練習咗幾星期。敦哥感慨，全球英語水平都有下跌趨勢，港人努力「刨冬瓜」北望神州之餘，要切記保持國際金融中心嘅競爭力，因為英語係世界語言矣。
由《大風吹雜誌》主辦、滙豐贊助嘅「滙豐為我講故事」，由𠵱家至七月喺各指定分行舉行，跟住重會有五位滙豐高級行政人員接力講古。
傳真︰2623-9278
電郵︰