沙士英雄鍾尚志突然辭任中大醫學院院長，電視重播當日佢喺立法會作供嘅一段說話，佢話沙士當時「就好似見到一個細路仔就嚟要跌落井，但係俾其他人攔住，救唔到人。」要醫生見死不救，唔通係香港回歸後嘅特色之一？喺香港無用武之地，巴布亞新畿內亞反而冇人阻佢行醫救人。
其實「細路跌落井」一番話係出自《孟子》公孫丑上篇一個故事：「人皆有不忍人之心，今人乍見孺子將入於井，皆有怵惕惻隱之心，非所以內交於孺子之父母也，非所以要譽於鄉黨朋友也。」特區班官冇啲惻隱之心，淨係識走精面、為私利、講假話、揸住雞毛當令箭，𠵱家啲衰人驅逐好人，人才都唔肯留低。
八方記得鍾尚志去年為記協周年晚宴做嘉賓上台致辭，佢話「多謝香港傳媒喺沙士期間如實報道，保住香港的honest。」政府靠唔住，惟有靠傳媒咯，聽到都心噏。
好多人猜測佢走嘅真正原因，八方就覺得六個字講晒，「哀莫大於心死」。高薪厚職都唔要，走去山卡啦咁遠，唔通為錢咩？
聽到鍾尚志要離開，醫院管理局嘅高永文話恭喜佢可以尋求自己嘅理想，服務人類，但係對醫學界就有好大損失。個人選擇，佢都只好尊重佢嘅決定。
鄭大班都好有心，噚日喺電台點咗三首歌畀鍾尚志，分別係楊永強唱嘅《LoveMeTender》、陳馮富珍《SmokeGetsInYourEyes》以及何志平嘅《友愛常存》，八方亦祝鍾醫生一路順風，唔好忘記香港人。
傳真︰2623-9278
電郵︰