好耐未見過咁靜，大市成交得141億元，恒指波幅得115點。有人話暴風雨來臨前夕特別平靜，唔知昨日算唔算係？
恒指是日微升1點，並冇失分，但升輪榜嘅阿1同阿2，都係久違嘅Put輪。排頭位係新地Put輪9166，彈高32%，阿2係滙豐Put輪9212，升咗27%。
呢兩件Put輪，數據完全唔實際。9166係跨價輪，封底價58元，距離正股（016）現價76.5元差幾條街，暫時當佢係標準輪嚟睇亦無不可。9166現價3.3仙，4月13日屆滿，溢價15.5%，槓桿率232倍似乎好勁，但實際作用有限。隻輪行使價65元，正股要喺34個交易日之內跌11.5元（15%）以上，隻輪先至開始有價值，你話機會有幾大？
9212現價1.9仙，4月22日到期，溢價16.7%，槓桿率668倍，行使價106元。正股（005）𠵱家做緊127元，喺41個交易日內會否大跌21元（16.5%）以上？大家自己諗。呢兩件Put輪去到尾9成會變廢紙。
國企股中滬杭甬（576）較標青，升4.5%，報5.75元。最活躍嗰兩件Call輪都有表現，9304升26%，現價41.5仙，玩到5月18日，溢價11.6%，槓桿率13.9倍；9294長1個月命，升21%，現價54仙，溢價11.7%，槓桿率10.7倍。兩件都唔算抵食，9304稍為好啲。
章盛