近年唔少女星走去拍纖體廣告，佢哋拍之前除咗要keepfit，重有一件好重要嘅事前工夫係非做不可，就係剃毛！點解馮仁昭咁講？話說有位幾紅嘅女星喺影樓影纖體相，佢平時俾人嘅印象總係雍容華貴，但偏偏佢着泳衣影相嗰日唔記得剃清楚比堅尼位啲毛毛，可謂千年道行一朝喪！
二五仔話俾馮仁昭知，呢位靚人喺影樓影纖體相嗰日，唔少工作人員都特登留低一睹佢嘅風采。當佢着住泳衣露出白雪雪肌膚嗰陣，在場人士無不讚佢駐顏有術，無論皮膚或者係身材都一樣保持得咁好。點知佢哋向下一望，竟然發現靚人嘅比堅尼位置未剃乾淨，好鬼礙眼，佢嘅助手亦發覺唔對路，一邊大叫停機，一邊用外套遮住靚人下身，帶佢入洗手間清理一番之後再影過，場面都幾尷尬。
成龍原來都好受傳媒效應影響，佢見呢排有關韓國影星張東健同元斌合演戰爭片《太極旗飄揚》嘅消息，差唔多日日出現喺報章上，搞到佢前日去韓國出席新餐廳剪綵嗰陣，話都要睇吓套片。韓國嘅電影公司已經安排成龍聽日下午睇片！而韓國型男裴勇俊下個月亦會去台灣為電影《挑情寶鑑》宣傳。
張達明大前晚喺西貢接受傳媒訪問時，透露籌備緊四月喺藝術中心舉行嘅個人棟篤笑，佢話：「𠵱家為咗度橋，搞到好頭痕！其實上年因為有太多唔開心嘅嘢，所以希望可以帶啲歡樂畀大家啦！」佢重話今次棟篤笑係不計成本，只為興趣。
新加坡每年都有唔少偶像選舉，好似其中一份當地報章搞嘅「學生選偶像」活動咁，陳松伶多年嚟都榜上有名，不過，今年松松班新加坡fans決定將投票所花嘅時間同金錢用嚟行善，齊齊捐錢去當地一個腎臟基金，幫助有需要嘅小朋友；如果香港啲fans都咁識諗就好啦！
葉蒨文將會係下月開演唱會，佢早前接受電台訪問，講起佢每次開騷嘅習慣，原來都要食餐腸蛋飯或者米粉。而佢老公林子祥雖然舊年喺紅館誤墮機關，不過老婆開演唱會，佢當然會支持，葉蒨文話：「佢梗係會喺度，我想佢幫我聽吓現場啲音響。」
台灣女子組合S.H.E噚日喺台北舉行唱片慶功宴，三位成員話今年係佢哋嘅行善年，佢哋公開表示拒收fans嘅禮物之餘，重話要將新碟嘅部份盈利捐畀慈善機構，而舊年成日受傷嘅成員Ella，承諾每月會捐二百幾蚊港幣助養小朋友。雖然只係小小心意，但作為偶像都咁身體力行，香港嘅偶像歌手都應該好好學習。
