期指下周四結算，但港股近日反而轉趨平淡，好淡冇乜大動作，噚日牛牛皮皮又過一日，恒指升1點，報13868，成交金額縮到只得141.69億元。
黑客話，由於政改爭拗愈演愈烈，芬老都要觀望一下事態發展。阿虎就唔信來香港炒股的資金，會因中央重申愛國論或者唔畀香港07年進行普選而撤出香港。不過，中央若唔再欽點一個醒少少嘅人做特首，資金遲早會撤出香港。
美聯（1200）被發展商削佣，搞到要發盈利預警，股價噚日再挫8%至2.30元，成交激增至1.96億元。據聞有歐資基金洗倉，真係冇陰功咯。現時樓市真係旺咗，新盤毋須再依靠代理促銷，減佣是好正常的發展，地產代理亦好應該重新專注二手市場，只有如此，二手樓市才可與新盤銷情相輔相成，令樓市真正全面復甦。阿虎預期今次樓市真係掂過碌蔗，美聯若能將焦點放回二手市場上，盈利前景未必會差。
中國網絡（383）高價配售天安中國（028），噚日復牌，一如阿虎所料般造好，全日急升9.8%，收1.34元，只可惜成交稀疏，阿虎始終唔敢跟入。
東方海外（316）以每股25.50元配售4700萬股後，股價表現堅穩，噚日升3.4%至27.25元。
最近有消息話，此股想做藍籌股，但東方海外現價計，市值只得128億元，就算計埋配股後擴大股本計，市值都只不過得141億元，藍籌股中市值最細的電視廣播（511）都有169億元，東方海外要做藍籌，似乎仍要努力。
阿虎