呢排經濟各方唱好,不過草根階層日子仍然難過,失業固然慘,有工開但收唔到血汗錢,就更係欲哭無淚。噚日中午十一點幾,就有一班房署清拆工程嘅地盤工人,難忍被大判拖欠幾百萬薪金,衝咗入政府總部大堂,要求面見房屋及規劃地政局局長孫明揚。
孫公由頭到尾都唔見人,最後由房署一位副署長及一位總結構工程師見工人。原來政府總部大堂最風頭火勢,人聲沸騰之時,孫公應人家邀請去咗隔冇遠嘅鏞記食晏,兩點幾先返辦公室,剛好避過咗請願者,真係唔好意思。
而鏞記因為禽流感而冇燒鵝供應,不過唔使為孫公擔心,好似話有人睇到佢歎魚翅喎,真係難為啲冇糧出嘅工人喇。
傳真︰2623-9278
電郵︰