上星期日本欄介紹一本四十年陳年舊書《中華成語辭典》，讀者Jess來函問小紅去邊度買到。據小紅話，係老牌書店「齡記書局」，喺電車路（即德輔道中）「亞洲商業銀行」斜對面，過咗恒生銀行總行，去西環方向行幾十步就到。不過小紅話呢本書唔知重有冇存貨，唔敢保證可以買到。
讀者Sandy問到車公廟轉風車，應該逆時針還是順時針。其實左丁山冇講過呢樣嘢噃，點解要問呢？既然問到，不妨分享見解。通常時運不濟，「行衰運」之時，到車公廟轉運，轉風車應該逆時針（逆轉運氣也，希望由衰變好）。如果一路順風順水嘅話，轉風車就順時針，祈求繼續順落去。以上係左丁山嘅諗法，各方高明如有正宗方法，請指教。
話說《壹週刊》《中環人語》專欄個人收視率極高，可能係全本書之冠，好多人唔睇封面故事都要睇吓宗菁華嘅《中環人語》。宗兄就好巴閉嘞，不過成日踎喺將軍澳辦公室，唔出嚟中環見人，於是不少商界、公關界朋友摸錯隔籬，以為壹仔中宗菁華就係左丁山。上日一間大型公共交通機構嘅公關小姐打電話搵到左丁山，一開口就話多謝宗菁華品提，第二句就話請食飯，搞到左丁山一頭霧水，講咗兩分鐘先知道佢擺烏龍，於是叫佢打電話去壹仔請宗兄食飯。點知公關小姐加多一句：「大家都知㗎嘞，唔使打去《壹週刊》嘅，搵到你即係一樣啦！」為之啼笑皆非，惟有第九百次聲明，宗菁華係大人物，左丁山係小稿匠，冇得相比，各方公關大員，請勿誤會為盼！